Stormy April

今天不想雕琢文字，讓我隨心所欲地寫下去吧！

話咁快就5月啦～2021年都就快過了一半！4月最後一個禮拜的事，我想我這一世也不會忘記吧？講緊嘅係辭職的事。返咗十幾年工以來，第一次辭工辭得這麼不開心的。熟悉我的人都會知道我這半年來經歷了甚麼事，就是一直在經歷不平等待遇，被人看扁，付出的努力／勞力與得到的薪水不成正比，都已經令我再找不到抖擻精神的理由，每天都覺得既然做極都係咁，已經冇必要再花心機努力下去了。但我自己又放不開，總覺得好似仲有啲嘢未完成，喺呢間公司度應該仲有啲嘢係我要去做，不過我又搵唔到係乜嘢。一整個矛盾與苦惱狀態，終於去到4月尾，連朋友都要飛往英國的日子，我突然有種好強烈的真係再無辦法忍受落去的感覺湧上心頭！就係咁，4月的最後一個禮拜一，我就遞信請辭了。

新阿姐和老闆都好心勸我留低，而我居然首次講原因講到喊晒，真係每同佢地傾一次都會喊一次！話我咁大個人仲喺職場上表露情感唔識大體唔知分寸又好，話我流眼淚搏同情都好，反正我當時真心好想走，好想可以喺生日前送自由俾自己，就將心裡面所有冤鬱委屈不滿一五一十毫無保留地講晒出嚟。仲直情好直接地講我係不滿職位同薪水。好似冇長大過一樣，喊到口罩都濕晒。新阿姐同老闆依家先發現，原來我一直保持笑臉繼續保持工作態度好似冇嘢咁，但原來係做得咁唔開心。（真係依家講起都有啲哽咽）終於，搞咗幾日，老闆都決定俾相應嘅薪金去留我，至於職位，由於阿姐只是來了一個月，覺得還是需要磨合，就set了限期，看看3個月後會不會提升。其實我都仲係好唔滿意老闆仲要壓價，不過，就係咁，我到最後都決定咗繼續留喺度，再睇定啲先決定係咪真係要離開。

已經唔想知其他同事如果知道咗的話會不會背後說我跳草裙舞、扭屎忽花，反正我遞信時已經係好絕望，呢種絕望係其他部門的懶人不能理解。而且，又係佢地自己話，老闆係應該出錢去留人，相信輪到佢地自己辭職的話，都會想上頭用錢留佢。如果唔明就算吧。

結果搵工的事，又變得沒那麼急了。生日已經肯定送不了自由給自己，但就可以把新的薪水當做今年的生日禮物 :D 就這樣，自己無意中搞出來的一個小風暴正式告一段落，猶如狂風掃落葉的速度，而且身處風暴圈外的人完全沒有察覺。決定留下來那天想起「STORM」的一句歌詞：「手を伸ばさなきゃ　あの光さえつかめない」，還有MV片頭的一句 "Reach out, or you'll even miss that light."，果然，自己想要的東西一定要靠自己雙手去爭取，不然只會一直原地踏步下去。不過，事關這次實在太容易被人誤會我是以辭職要脅加薪，所以，希望下次不用搞到這個地步，自己可以處理得好一點。=.="

今個月尾我就滿3x歲，5月應該都繼續會有好多變化，希望我都可以冷靜面對處之泰然。工作上都終於有一種受人錢財替人消災的心情，繼續試下啦，磨合下啦，咁大個人，都唔可以再躲藏喺別人後面等人保護了。